政情：周賢秀推廣「綠惜生活」減廢
環保嘅生活習慣，真係要從小養成。曾經做過學生環保大使嘅城市女青年商會會長周賢秀（Joyce），少年時代就已經對環境污染有深切體驗，以致後來投身社會，亦對環保工作念念不忘。Joyce早前以會長身份主持「童創綠惜生活」活動，期望下一代能夠養成減少浪費嘅生活態度。
Joyce憶述讀中六嘅時候，獲環保運動委員會評選為學生環保大使，其後到訪東南亞國家觀察環保狀況，印象深刻就係登上菲律賓某個經常受颱風侵襲嘅小島，探索氣候變化與貧窮嘅關係。Joyce話，島民只靠收集柴薪透火煮食，雖然島民對資源嘅消耗極少，但漂洋而至嘅垃圾，就多到唾手可得，而島民嘅處理方法亦有一手，就係將呢啲外來廢物化為家居裝飾。
關德仁甘做人肉廚餘機
Joyce眼見文明社會所產生嘅垃圾，就連生活原始嘅島民亦受到波及，反映環境污染可以無遠弗屆，所以要做好源頭減廢，從小就要養成珍惜同節約嘅生活態度。同場嘅國際青商會總會會長關德仁，就做人肉廚餘機，包攬家人食剩嘅飯餸，以減少廚餘。