政情：捉精靈爭帶隊 區議員齊抽水

西貢區議員何民傑透露，西貢區議會大樓內有大量比卡超，加上醒起政府成日話要下放權力畀區議會，所以就諗出舉辦捉精靈活動，畀機會居民認識西貢區內區議會有份參與管理嘅文康設施場地，而自己亦能從中聆聽居民意見，實行一舉兩得、寓工作於娛樂咁話。

何民傑揈錢買道具

何民傑將舉行「Pokémon玩轉社區三重奏」活動，仲話海報一出已接到唔少查詢，相信活動會反應唔錯。三重奏有入門班，亦有名為「放花瓣一小時」嘅活動，佢話其議員辦事處位於PokéStop附近，所以佢會喺八月份定時自費購買道具「放櫻花」（Lure Module）去吸引小精靈出現，從而吸引居民前往捕捉精靈，趁機同居民一齊討論社區事務。

重頭活動性質就類似導賞團，安排車輛接載居民到區內唔同嘅地方捕捉小精靈。佢話已落力搜集資料，務求編排行程時能夠覆蓋最多精靈出沒嘅地方，同時亦歡迎網民報料，仲話即使係清水灣都會去！去咁多地方，睇怕佢要準備好叉電器先得喎。

除咗何民傑之外，九龍城區議員鄺葆賢日前亦搞咗精靈社區導賞團，而沙田區議員趙柱幫有時夜晚都會同居民、義工喺沙角邨、城門河附近一帶齊齊捉精靈，而辦事處亦會提供叉電器，又會幫居民安裝遊戲齊齊玩！而佢喺上星期跟進黃蜂入屋問題時，就搞笑稱黃蜂為小精靈大針蜂，仲話已通知管理處拎精靈球上樓視察，直情化身精靈訓練員咁添！

討論事務 成效存疑

依家嘅區議員夠晒追貼潮流，務求拉近同居民嘅距離，但如果居民參與活動時只顧捉精靈，而唔係從中可以做到討論社區事務嘅目的，咁都只係搞噱頭啫，成效必然大打折扣。