政情：今日你上鏡：黃傑龍帶囡囡搭迪士尼郵輪
呢排好多政商界名人都趁住暑假外遊，我哋尋晚就喺機場「捕獲」叙福樓集團執董黃傑龍（Simon），見佢「一支公」好孤單咁拖住行李落機，原來佢啱啱同老婆、囡囡一齊去完美國同加拿大，仲足足玩咗三個星期咁耐，但佢就因為工作關係要自己返嚟先，難怪咁寂寞啦！
不過，一提起今年九歲嘅囡囡，Simon就即刻笑晒口，話囡囡好鍾意迪士尼人物，所以趁暑假專程帶佢去美國佛羅里達州去搭迪士尼郵輪，一家三口又喺小島享受陽光與海灘添！咦？件衫係美國隊長嚟o架喎，Simon解釋係因為佢哋去埋奧蘭多嘅環球影城，但佢似乎對呢個樂園唔多滿意嘞，話嗰度啲設施比較殘舊，試過排咗個幾鐘機動遊戲，之後出現機件問題結果冇得玩，白白浪費時間；加埋老婆同囡囡都唔敢玩刺激活動，搞到佢勁無癮，要買番多啲手信順番條氣喎，而佢身上嗰件美國隊長衫就係戰利品之一。