梁振英日前出席本屆立法會最後一次特首答問大會，係人都估到佢會四面楚歌，想不到今趟更是八面受敵，泛民建制恍如劍氣嚴霜催逼，搞到佢一時O嘴，一時無奈苦笑，一時唏噓蹙眉，老朽都戥佢辛苦，不禁浮起李白詩句：「霜威出塞早，雲色渡河秋。」如今炎炎盛夏，烈日當空照，何以嚴霜卻在立法會降臨？
建制派擺到明急於割席求自保，工聯會議員郭偉強炮轟CY的勞工政策全部得把口，是以憤而把其政綱狠狠地拋諸腦後，更離場抗議。呢一幕七情上面，縱使有人認為係做騷，之不過交足戲，戲假情真，老朽投佢一票！CY確係九月立法會選舉嘅票房毒藥，邊個揩埋去，必衰無疑。
一個政府失信於民，點樣「穩中求變」都變得頭痕，再自吹自擂如何「適度有為」，也難挽狂瀾於既倒。本屆政府上台四年多，香港沒有一日安靜過，爭拗不斷、社會撕裂、矛盾尖銳、民怨沸騰、暴力街頭……阿哥，幾乎所有「亡國」因素都在這個「福地」發生及出現！所謂的施政「成熟一項推出一項」，變成「推出一項跪低一項」，政府失信，只有膽自大，有用嗎？冇靈魂政府還不是落得荒腔走板，施政寸步難行。
最可笑的是，梁振英叫議員要「實事求是」，然而他自己是否「實事求是」呢？搞環保執垃圾都要做騷，好地地嘅郊野公園竟變成「膠嘢公園」！避談廉署人事地震，其實不描也黑，講真，若然實事求是，便不應龜縮敷衍。戀棧權力即使是政客之常情，可是去到眾叛親離，依然視權力如春藥，還希望有人「勸進」，那分分鐘落得自討沒趣。所謂「實事求是」，它的上一句是「修學好古」，一個人知所進退，下台修行才是俊傑，老朽冀CY深思之，亦祈求上蒼賜香港一個分得清誰是敵人誰是朋友的特首。