政情：廠商會陳婉華建構網絡秩序
好多人都有上網買嘢嘅經驗，不過現時交易過程仍未算百分百安全，唔少買家怕貨不對辦，賣家就怕收唔到錢。普通市民尚且咁擔驚受怕，何況係做生意嘅商家？因應時代改變，中華廠商聯合會早前決定喺屬下三十五個行業委員會之外，新增一個「城市智能化行業委員會」，由廠商會會董兼資深IT專家陳婉華（Eva）出任首屆主席，希望推動建立一個更安全可靠嘅網上商業世界。
Eva話，今時今日做生意已離唔開互聯網，不過網上商務秩序仍未建立完善，好似身份同文件嘅跨國認證，冇理由再用傳統實體方式去運作。呢項工程好龐大，要匯聚各界嘅力量包括資訊、製造、金融、環保、檢測同認證嘅專家，所以廠商會係一個好適合嘅平台。做電鍍環保生意嘅廠商會會董吳國安就好期待Eva做出一番成績，咁以後做生意就唔使飛嚟飛去咁頻撲喇！