政情：歐遊「跌鎊」 安心玩埋英國
今屆立法會曲終人散，直至十月新一屆議員履新同復會前，係立法會秘書處最空閒嘅時間，多位秘書處首長級職員都會輪流放假，輕鬆一下。其中立法會秘書長陳維安原本已經計劃同屋企人一齊去北歐旅行，依家英鎊大跌，佢更加心思思想加碼玩埋英國，真係聽到都興奮！
玩夠本迎新一屆立會
今屆立法會可以話係多事之秋，除咗議員不斷點算法定人數及流會次數為歷屆之冠，立法會喺呢四年亦發生過唔少衝擊事件，包括審議新界東北發展前期工程撥款時，畀示威者包圍同衝擊立法會大樓。之後佔領行動爆發，立法會更一度淪為佔領搞手嘅指揮中心。去年底審議《二○一四年版權（修訂）條例草案》期間，立法會示威區更發生垃圾桶爆炸案，為立法會秘書處增加咗大量工作。
陳維安自一二年六月起出任秘書長一職，完整地經歷咗今屆立法會發生嘅一切大小事件，難得立法會換屆出現空檔，佢就準備同屋企人去北歐旅行。佢仲同我哋講，英國早前舉行公投通過脫歐，令英鎊價格大跌，佢同家人可能會趁機去埋英國，發揮港元嘅強勁匯價威力，一次過玩番夠本，以便迎接可能更具挑戰性嘅新一屆立法會。