政情：梁家騮拉布冇朋友 合照搵鬼吼
第五屆立法會會期上星期五晚煞科，備受爭議嘅《二○一六年醫生註冊（修訂）條例草案》一如所料未能完成三讀表決，最快要等到下年七月先可以重新開始立法程序。身為業界代表嘅醫學界議員梁家騮，自七月初發動一個人拉布戰，喺立法會會議上不斷要求點算法定人數，搞到建制派同泛民主派議員都叫苦連天。草案最終如梁家騮所願被拖垮，但代價就係冇晒朋友。事關喺煞科夜當晚，無論建制或泛民都唔願意同佢合照，梁家騮惟有拎起佢嘅斜孭袋同文件，孤身一人悄悄離開熱鬧嘅會議廳。
建制泛民同玩杯葛
雖然《二○一六年醫生註冊（修訂）條例草案》最終逃唔過難產嘅命運，但一眾議員喺午夜十二點後，仍按照傳統喺會議廳內影大合照。除咗因病休假嘅鄉議局前主席劉皇發，以及一早揚言唔會影大合照嘅公民黨陳家洛，大部分議員都乖乖哋企喺會議廳合照。大合照過後，建制派同泛民即刻各有各影，分別同唔再競逐連任嘅議員合照留念。值得留意嘅係，雖然梁家騮都唔再尋求連任，但無論建制同泛民都冇人搵佢影相，冇晒癮嘅佢惟有喺大家唔多覺嘅時候，自己一個離開會議廳。睇嚟一場拉布戰，已經令到梁家騮冇晒朋友。
大舊試抬保安不果
此外，經常喺會議期間被逐嘅社民連梁國雄（長毛）及人民力量陳偉業（大舊），趁大合照前「佔領」主席台。長毛坐喺主席位上發言，大舊就企上台高舉勝利手勢，兩人大叫「佔領主席台，梁振英下台」，主席曾鈺成亦作狀高叫「趕陳偉業出去」，隨即惹嚟哄堂大笑，長毛同大舊之後亦畀保安人員勸落台。
經過十五個鐘馬拉松式會議，唔少議員影完相都趕住去醫肚，但大舊就走咗去保安部挑機，話要試吓抬走保安人員，可惜並唔成功，反而由保安人員示範抬走人嘅技巧，將大舊抬起。其實大舊過往不時被抬走，相信今次對保安人員嚟講係駕輕就熟喇！