中環出更：聲討漢奸黎團體一日兩踩場
反壹傳媒黎智英（漢奸黎）嘅怒潮浪接浪，自上個月起，不滿漢奸黎人士陸續踩上漢奸黎寓所同壹傳媒大樓外抗議，尋日更加出現同一批人兩度前往黎宅示威。不過漢奸黎上月底離港避風頭，直至尋日下午五時許先返到屋企，睇嚟佢「避得到初一，避唔到十五」，有排都唔使旨意有安靜日子過。
尋日朝早十一點左右，八名示威人士手持寫有「毒媒肥黎、黑金亂港、禍港殃民」嘅橫額，同埋關於漢奸黎嘅剪報表達不滿，眾人逗留咗大約五分鐘即散去。唔知係咪意猶未盡，下午約兩時，同一班示威者重返漢奸黎寓所外，佢哋手持同樣嘅橫額逗留大約十分鐘就離場。
漢奸黎甫返港遇示威
到咗下午五點幾，着住粉紅色T恤、短褲同戴住草帽嘅漢奸黎搭車返到寓所，見佢略顯疲態，要用手扶住車門落車，再慢慢行入屋。一個半鐘後又同屋企人去一間日本料理店食晚飯。
漢奸黎得罪人多、稱呼人少，自上月十日起，被示威人士上門抗議嘅次數最少有十六次，當中包括自稱霸王國際集團員工同苦主嘅佔七次、正義聯盟有三次，旅遊業界同其他人士加埋就有六次咁多。
卓妮