中環出更：迎接奧運風 無障礙營舍啟用
香港傷健協會（協會）尋日啟用一個無障礙設施營舍，為傷殘及健全人士帶嚟新嘅營舍體驗。香港殘奧會會長馮馬潔嫻（Jenny）、殘奧金牌得主蘇樺偉、馬會副主席周永健同協會副主席孔美琪等都有到場。奧運會下個月會喺巴西登場，跟住九月就輪到殘奧會，可以預見即將刮起一場運動風潮。周永健都自爆好鍾意做運動，尤其係網球同高爾夫球，不過已經好耐冇打，因為冇時間喎！
港殘奧發展獲稱許
加入咗香港殘奧會多年嘅Jenny就話，香港殘奧嘅發展算係唔錯，記得創會初期成員只得小貓幾隻，依家已經有二十幾名成員。仲有，早年殘疾運動員參賽要靠殘奧會幫手籌組經費，依家就同正常運動員一樣可獲政府資助，大家先至毋須再煩心咋！
同場仲有身兼協會名譽會長嘅香港大學前副校長周肇平，佢早前就用咗三個月環遊世界，順便探訪老朋友。不過咁悠閒嘅日子已經過去，因為佢依家加入咗養和醫院做副院長。不過佢已經有半年冇睇症，所以依家要日日睇症以便收吓心，習慣吓返工嘅生活。
卓妮仲見到孔美琪嘅媽媽丁毓珠、囡囡吳嘉愉（Melanie）三代同堂，雖然家族經營幼稚園名校，但原來Melanie並無入讀，皆因婆婆怕佢身份曝光後老師會縱壞佢。Melanie目前喺投資銀行做嘢，佢話如果媽咪開到聲，都會返嚟幫手搞教育，所以都想讀番個教育學位添！
卓妮