政情：卿姐臨別走數唔着吊帶裙
今屆立法會正式曲終人散，做咗四分一世紀議員嘅民主黨主席劉慧卿亦將退下火線。臨別秋波，本來以為卿姐會着上三十多年前為人津津樂道嘅吊帶裙，點知佢竟然走數。卿姐話：「我劉慧卿應承得你嘅點會唔做吖，我第日搵個最爆嘅場合，搵個電視台現場直播，唔係淨得個facebook直播先着。」除咗着吊帶裙時間表「一拖再拖」，卿姐仲公開數簿，唔通係要力證無幕後金主？
卿姐尋日舉行告別記者會，一開波就拎出廿五年前嘅參選單張，強調唔會忘記追求「人權、自由、民主、法治」嘅初衷。卿姐亦拎出多年來嘅數簿，除咗選舉捐款，累計收過一百三十多萬元嘅資助，全部用喺議員辦事處；而佢亦由二千年起「嘔突」一百七十多萬元供辦事處用。卿姐話，公開帳目係希望政府明白議辦唔夠錢使。
臨別依依，有人問卿姐會唔會喊，佢笑言廿五來都冇喊，點會最後一日喊呀？不過佢就話香港未有真普選，簡直係「遺憾到喊！」至於日後做啲乜，卿姐話要抖吓先，又笑言十月一日正式卸任，起身會唔知做咩，都幾得意喎！