中環出更：掟政綱 郭偉強琢磨姿勢
工聯會立法會議員郭偉強前日喺特首答問大會上突然掟特首梁振英（CY）嘅政綱，迅即成為網絡紅人。郭偉強尋日解構話，佢曾經想將政綱掟向枱面，但由於平時無掟慣嘢，驚掌握唔到。佢又諗過掟向前，但又擔心會掟中坐喺前面嘅民建聯譚耀宗同葉國謙，所以最後選擇「拋諸腦後」姿勢，將政綱向後拋落地。瀟灑有型，難怪泛民及建制派議員都齊齊拍枱叫好。
同事親製道具
郭偉強做議員四年以來，一向作風低調、斯文，點知喺今屆立會會期結束前，不但狠批CY在標準工時、全民退休保障及取消強積金對沖問題「得把口」，更學人哋掟嘢。郭偉強透露，呢份「政綱」係同事用A3紙摺疊而成，幸好最後抽中佢發言，唔係就白費心機喇！至於會否將CY「掟走」，佢話無能力掟走佢，但認為做特首最緊要「做到嘢」。
被問到事後有冇人同佢詐型，佢笑稱大家都認為掟政綱效果不錯，可能係平日少掟嘢嘅關係。工聯會陳婉嫻就嫌掟政綱唔夠，認為要撕爛先足以發洩對CY「走數」嘅不滿喎！
卓妮