中環出更：慈善無界限 助傷健共融
潮流興跨界合作，靚衫、美酒再加上慈善元素，令華麗背後更添意義。早前「愛‧共融慈善晚宴」喺中環一間名人私房菜館舉行，為「香港復康力量」籌款，籌委會主席薛幼妮（Amanda）講起舉辦今次活動嘅原因時話，佢十九歲嘅弟弟早前車禍受傷，左腳趾及右手指要切除，Amanda出入醫院期間見到好多病人無助嘅眼神，決定為殘疾人士做啲嘢，於是聯同好友兼時裝設計師丘雪祺（Cecilia）及有「味蕾設計師」之稱嘅著名美食家蔡昊，齊齊搞一場時尚跨界慈善晚宴。
一向擅長設計婚紗晚裝嘅Cecilia今年首次破格推出男裝高端訂製西裝，當晚特別設計三種適合唔同性格男士穿着嘅系列，同蔡昊調製嘅三款雞尾酒互相輝映。Amanda及蔡昊當晚着嘅靚衫都係由佢操刀設計，當晚亦接受有愛心嘅暖男訂製西裝，收入將捐助予復康力量。Cecilia話，今次活動好有意義，所以瞓身支持。
輪椅鬥士挑戰自我
復康力量會長葉湛溪、平等機會委員會主席陳章明都有到場。葉湛溪話，佢哋有七間社企做為培訓殘疾人士嘅基地，例如喺醫院賣復康產品嘅活力店等，不過好多間都仲蝕緊錢，所以需要善心人士施出援手，助殘疾人士重投社會。花名叫「史泰龍」嘅輪椅鬥士仇健明就分享自己因為食肉菌而導致截肢嘅故事，佢最近積極練泰拳激瘦廿磅，因為希望可企番起身、裝上刀片跑馬拉松，佢積極嘅人生觀令現場賓客莫不動容。
卓妮