政情：政見不合 乳鴿跳船變本土
近年本土派崛起，就連傳統泛民政黨都開始講本土。但有民主黨（白鴿黨）成員認為自己政見同黨唔夾，決定「跳船」加入近來冒起嘅本土派組織。曾參選過舊年區議會選舉嘅劉肇恒，經過旺角暴動事件後，喺三月退出白鴿黨，一個月內改投青年新政。唔通嫌白鴿黨太溫和？
劉肇恒之前喺白鴿黨做社區主任，跳船後就喺學校做研究工作。佢出戰區選時未有同青年新政撞區，但一直有留意該組織，了解其嘅政治理念。決定退出白鴿黨時，亦有黨友了解原因，但佢「去意已決」，所以未有作出挽留。
仲有冇同舊黨友聯絡？劉肇恒話依家少咗，甚至有時見面都覺得有啲尷尬。依家佢有時都會喺青衣開街站，唔知啲街坊會唔會搞錯，仲以為佢係白鴿黨成員呢？佢就讚班街坊好醒目，話以前係着綠色衫，依家就係橙色衫，可能因為咁，所以班街坊無搞錯。