政情：尹兆堅自爆曾做酒店門僮 識講日文

尹兆堅話，學日文只係工作需要，事關佢當年預料畢業之後，去咗日航酒店做門僮（bellboy），當時酒店要求門僮都要識得日文，所以佢除咗跟住酒店提供嘅日語手冊自學外，亦都因為同客人講多咗而工多藝熟。佢好有信心咁話，雖然多年無講，但早前去到日本旅行仍然係可以應付基本對答。

講到喺酒店工作有咩難忘事，尹兆堅就話，有次有個客人好豪爽咁畀咗成千元貼士，令佢記到依家，一來因為銀碼好大，二來因為畀嗰個係當紅明星萬梓良。佢話，依稀記得當時萬梓良已經半醉，所以先咁豪爽，仲話呢啲事真係可遇不可求。因為做咗兩年門僮，於是儲夠錢升讀大學，之後開始投身政界，強調自己有今時今日都係捱番嚟。