中環出更：阿基拍愛情「自傳」 緊張猛NG
早喺四、五年前，內地一個「愛情天梯」嘅故事令好多人深受感動，但政壇亦有令人感動嘅愛情故事，主人翁就係民協立法會議員馮檢基（阿基）。阿基當年讀大學時認識太太陳敏慈，力追十八年先成功拉埋天窗，故事最近更被年輕人拍成微電影，更有機會到美國參展。今次阿基都有粉墨登場在片尾拍一個鏡頭，但就因為緊張NG約十次先完成，仲以為議員做戲好叻添！
追求太太十八年 曾收「好人卡」
當年阿基就讀香港大學，在七四年組學生會內閣時認識太太，但當時太太對佢冇興趣，更曾經多次拒絕。直到阿基在英國完成學業，大概喺八六年時再次向太太表白先成功，直至九二年結婚。原來早喺七四年已有「好人卡」出現，當年阿基正正就是收咗太太嘅「好人卡」，即被對象以「好人」為由拒絕。其後阿基喺八三年至八五年間多次表白，但都係慘食檸檬。
阿基透露，事緣今年四月在飯局期間認識拍攝微電影嘅年輕人，年輕人對佢嘅故事好有興趣，於是花咗不足兩個月時間拍攝，而片頭和片末都喺佢家中拍攝，但片中嘅太太只係演員，而真正嘅馮太就唔肯出鏡喇。
卓妮