中環出更：商家促助建中小企品牌救市
香港零售業跌跌不休，有人呼籲政府重新催谷內地客來港消費，政府亦決定大灑金錢推廣旅遊。一直關注零售業嘅香港品牌總商會創會會長兼「假髮大王」趙振國就話，遊客嘅消費模式對香港小企業及市民嘅幫助唔大，與其成日想搵遊客嚟打救零售業，不如支援中小企業建立品牌，事關只有建立品牌先至係解決工業界、零售界困境嘅出路！
趙振國冀政府改規則吸客
品牌總商會早前舉行周年晚宴，數百名政商界人士齊撐場。一向敢言嘅趙振國趁機呻話，早前商會申請到三百八十萬元政府基金到內地推廣香港品牌，於上海展覽近三個月，竟然一個查詢都無。因為政府規定不能用於銷售商品，只能展示及接受諮詢，結果根本無法吸引內地人入場，效果極差，認為政府要改變吓規則至得。
同場仲有做鐘錶生意嘅晚宴籌委會主席黃業光（John）及副主席徐珊雯，早前英國公投決定脫歐令環球貨幣波動，John喺英國都有幾層樓，但佢就睇得好開，話樓價可能下跌，但換英鎊供樓就平咗，所以唔擔心咁多喎。
晚宴同時舉行「香港精神」品牌大獎頒獎典禮，選出包括中華廠商聯合會常董沈運龍嘅專利鑽石設計冠玲瓏等十一個優秀品牌。通利琴行副主席兼總裁李敬天見到創下健力士世界紀錄嘅寶石結他，睇得十分入神，原來佢有份喺製作技術及海外展出方面出力，難怪流露出滿意嘅笑容喇！
卓妮