香港地搵食愈來愈艱難，打工仔擔心飯碗不保，係人之常情，估唔到連身為打工貴族、部分更加係「月球人」嘅大國手都唔例外，你話佢哋憂患意識重好吖，抑或太矯情好呢？
《二○一六年醫生註冊條例（修訂）草案》最近引發滿城風雨，特別係醫委會增加四名非業內委員，醫生團體群起反對，批評港府通過委任新委員操控醫委會，影響業界自主，又話今次改革係為日後引入內地醫生鋪路。當然喇，杏林精英境界好高，唔會淨係掛住自己飯碗，而係擔心內地醫生質素參差不齊，影響市民福祉喎。
即係咁，今時今日中港矛盾尖銳，加上內地醫療黑幕比香港有過之而無不及，醫學界嘅質疑，的確觸動部分市民敏感神經，問題係大批內地醫生落嚟搵食，到底係事實定係靠嚇？食物及衞生局局長高永文係咁講嘅，非本地醫生要喺香港執業，必須通過本地兩間醫學院舉辦嘅執業試，雖然醫管局可以透過有限度註冊聘請海外醫生擔任駐院醫生，但佢哋唔可以受僱於私人機構，而由於資歷架構唔同，醫管局目前只可以聘請英、美、澳、加等地醫生，根本冇出現內地醫生來港行醫嘅情況。
或者有人會話，官僚靠得住，豬乸會上樹，唔信官僚可以信數據。有醫學界人士計過數，九七後港府唔再承認英聯邦國家嘅醫生資格，海歸醫生要參加執業試，合格率長期以來都係得個位數字，相比起美國同埋英國對外來醫生執業資格試嘅七成以上合格率，簡直係蚊髀同牛髀。海歸醫生尚且如此，內地醫生接受中文教育，要應付香港嘅英文執業試，你估話咁易咩！
好嘞，家陣唯一嘅問題係，醫委會負責醫生執業考試以及制訂專業守則，如果今次改革通過，會唔會大幅降低海外醫生來港門檻？好簡單，即使醫委會業外人士增加一倍，依然只佔少數，醫生專業自主唔會受到挑戰，本地醫生飯碗一樣穩如磐石。
有人話醫學界之所以視修例如洪水猛獸，根本原因係拒絕接受公眾規管。唔係話小人之心度君子之腹，但事實擺在眼前，醫委會處理投訴慢如蝸牛，而且幾乎次次都高高舉起，輕輕放下，增加業外聲音，已經係民意共識。老實講，業界都唔想長期食「醫醫相衞」呢隻死貓o架，吓話！
有病人組織代表就講得啱嘞，今次改革已經好溫和，亦得到主流民意支持，醫學界講到冇嘢好講，咪挑起市民對政府嘅不信任，同埋攞中港矛盾嚟講囉。群眾眼睛雪亮，邊個為自己利益，邊個為大棚福利，呃唔到人嘅！