政情：「貓爸」徐英偉 教仔「開心就得」
近年怪獸家長橫行，早前更加有家長喺節目上發表「贏在子宮裏」同「贏在射精前」嘅偉論，好露骨話夫妻行房前要先計算好子女出生月份，言論令社會嘩然。本身有兩個仔嘅民政事務局政治助理徐英偉（Caspar）就話，兩個仔分別喺十月同七月出世，證明無計過日子生仔，又話小朋友唔使贏在起跑線。不過，佢太太就有唔同意見，名副其實係「虎媽貓爸」。
Caspar話，五歲大仔喺十月出世，喺班中算係中等，雖然唔算太聰明，但又唔覺得佢蠢人好多。現時大仔每星期會學四樣課外活動，包括游水、欖球、跆拳道及繪畫，又因為讀國際學校，所以會額外上普通話課。佢話，所有活動都係大仔自己想學，而且仲提出上更多班，好似學砌LEGO咁，但佢就覺得太貴，寧願買盒LEGO陪個仔一齊砌好過。
太太做「虎媽」分工合作
由於Caspar自細成績都係剛好過關，所以佢對兩個仔都唔會有好多要求，只要開心就得。不過，本身來自精英名校嘅太太就有唔同睇法，覺得個仔樣樣都叻過人，對以後都有好處。所以兩公婆就分工，佢管EQ（情緒智商），太太管IQ（智商），等兩個仔各方面都有良好發展。