中環出更：瑜伽會籍剩兩年 謝偉俊「冇得驚」
有健身中心及瑜伽中心嘅營運商，早前被前董事申請清盤，買咗會籍嘅客戶人人自危。原來立法會議員謝偉俊（Paul）都以五位數字，一炮過買咗三年瑜伽中心會籍，依家仲剩返兩年幾未用。Paul因為太忙，之前冇留意到呢單案件，被問到擔唔擔心其會籍「凍過水」，Paul就話冇得驚喇，如果咁大間舖都出事就無法喇。
考慮優惠揀計劃
身兼律師嘅Paul又話，如果太多人因為恐慌而作出不理智嘅行為，只會令情況更壞，所以都再觀望吓先，相信可能係涉及董事之間嘅糾紛，係咪成功清盤，仍然言之尚早，毋須太驚住。Paul又話，佢都幾鍾意玩瑜伽，每星期最少都去一次，有時甚至去三次，或者得閒就一日去兩次添，但近期就比較忙，去少咗好多。咁以後會否保險啲，揀啲月費計劃，佢就話睇情況啦，因為都要考慮優惠價錢嘅。
卓妮