中環出更：聯手「包底」美容業界力挽形象
唔少人都鍾意幫襯美容院扮靚，但美容院同消費者不時出現糾紛，令行業備受負面形象困擾。香港美容專家及保健協會（協會）早前舉行就職典禮，創會會長兼現代美容創辦人曾裕（ Joyce）就話，協會將聯同全港業界嘅力量為行家提供支援，包括義務為受結業影響嘅客戶提供餘下療程。如果真係做得到，相信成日驚踩中美容院倒閉「地雷」嘅城中姊妺，個心都會定啲。
Joyce話，依家已經開始支援業界，咁呢層保障係咪只限於協會會員？Joyce好豪爽話：「全行都適用，唔使受限於會員，最多咪我做晒佢！」Joyce底氣十足，不愧係「美容天后」。
「美容教母」分享保健心得
同場仲有協會永遠名譽會長兼「美容教母」鄭明明、舒適堡董事何玉華、修身堂行政總裁關菲英及常董關碧英等人。現場個個都係美容保健專家，唔知眾人有咩秘訣？何玉華話，最緊要係飲食及作息正常，最好夜晚十一點前瞓覺，但真係好難做到，佢一個星期只係做到一日咋！
明明姐就話，最緊要保持心境開朗。早前佢出席集團成立五十周年晚宴期間，突然發現唔見咗四卡鑽飾，當時覺得好唔開心，一度心急想返屋企搵，但係衡量輕重之後，都係暫忘件事搞好晚宴先，結果後來喺自己手袋搵番鑽飾。所以話，做到心無罡礙好重要。
Joyce丈夫李守義及契女彭濼錡都有到場，有女萬事足嘅李守義話，湊女就最開心喇！
卓妮