夏日炎炎，熱浪逼人，又係碧波暢泳嘅好時節。難得嘅係，近排黑氣纏身、人稱「漢奸黎」嘅壹傳媒老闆黎智英一樣唔執輸，連日來孖住外籍人士出海遊船河，唔通真係唔知個「死」字點寫？
冇錯喇，漢奸黎被指係「佔領搞手」及「金主」，涉嫌組織及參與非法集結兩項罪名，隨時被警方再次拘捕；而其中一名涉嫌收錢嘅立法會議員更被廉記落案起訴，兔死狐悲，話佢唔驚呃你嘅啫。仲有吖，淫媒經營慘淡，旗下刊物摺完一份又一份，睇嚟淫媒都唔撐得幾耐咯，加上佢老哥官司纏身，又得罪人多，搵佢算帳嘅示威行動簡直一浪高過一浪。話口未完，尋日又有大批市民拉大隊到黎宅門口抗議，直斥佢「黑金害社會，誹謗累企業」，要求司法機構認真懲處黑金事件。漢奸黎呢輪一褲都係，照計應該冇閒情逸致遊船河（口架）。
正所謂不近情者多藏奸，漢奸黎喺風頭火勢下頻頻出海，背後必定有景轟，斷估唔會遊船河咁簡單。係人都知，漢奸黎反中亂港，宣淫販賤，臭史仲長過阿婆條紮腳布，拍住洋人密密斟，係咪商討賣港賣國最新奸計，只有佢老哥自己心知肚明。
至於點解要出海？其中一個原因可能係漢奸黎睇得港產賭片多，以為出咗公海就係三不管地帶，可以為所欲為。再講吖，漢奸黎之所以被揭發充當反對派金主，都係因為電郵被曝光，佢吸取教訓，有咩唔見得光嘅嘢，鬼鬼祟祟，臭屎密冚，一啲都唔出奇。
即係咁，對於漢奸黎嚟講，賣港賣國，向洋主子表忠心固然係唔少得，但點都唔及得為自己準備後路咁緊要。佢老哥近排突然話要「退休了」，「想回頭了」，明眼人一聽就知，今時唔同往日，中共第五代上台後，打鐵還需自身硬，喺內地鐵腕反貪官，喺香港就鐵腕掃漢奸，漢奸黎自己知自己事，乜嘢退休呀回頭呀，講到尾都係腳底抹油，走為上着啫。
話時話，漢奸黎狡兔三窟，一早喺英、法等地坐擁大量物業，反而喺香港就租屋住，連「根」都冇，擺明隨時準備着草，近排佢密密出海，話唔定係想先探下路。佢當年游水落嚟香港，今次游番水走都好合理，唯一問題係佢老哥呢幾十年發埋發埋咁多宣淫販賤、賣港賣國嘅不義之財，早就腦滿腸肥，唔操番Fit啲泳術點得（口架）。
當然喇，多行不義必自斃，漢奸黎未必等得到着草嗰日。英國詩人拜倫詩云︰「冬天到了，春天還會遠嗎？」收受黑金嘅政客被起訴，始作俑者落鑊還會遠嗎？