有人話內地嘅寫真模特兒「味精」太重，佢哋嘅寫真係就係性感又養眼，但係化個妝太濃，極趕客！嚟自重慶嘅猩一剛剛相反，喜歡素顏示人，對自己嘅樣貌充滿信心，唔係咁多模特兒可以做得到。
現年24歲嘅猩一，原名叫李猩一，名字相當特別，令人聯想到大猩猩。不過睇過佢嘅寫真後，非但唔會有咁嘅感覺，反而為佢迷人嘅樣貌同埋前凸後趷嘅身材而傾倒。一啲都冇講得誇張，事關佢擁有35吋上圍本嚟已經極具睇頭，加上俏麗嘅樣貌配合帶幾分楚楚可憐嘅眼神，嗰種魅力從眼球直達靈魂深處，男人點會唔冧吖！
阿妹除咗走純情形象，不時會作出唔同嘅嘗試，早前佢就玩情趣綑綁主題，以一身超性感造型示人，帶畀觀眾前所未有嘅視覺刺激，正到痹！相信冇人估得到原來佢可以如此狂野大膽，亦證明佢嘅可塑性相當高，同時魅力爆燈。而佢對自己嘅外表充滿自信，經常以素顏登場，須知道唔係好多模特兒敢以真面目示人，足見佢天生麗質，難怪佢大受廣告商歡迎，近期仲參與微電影嘅演出添。
阿妹外表清純，又可以配合唔同嘅造型演繹出野性味道，咁實情佢嘅性格係點嘅呢？有人話佢嘅個性屬於呆萌一族，因為佢經常喺微博上分享迷路嘅瘀事，因而被人取笑佢冇方向感、大頭蝦，所以有次佢成功冇蕩失路，就好興奮咁喺網上稱讚自己。此外，阿妹係一個好有愛心嘅女仔，話說上個月底一個夜晚，當佢路過重慶三峽廣場時，見到一隻冇頸圈又冇狗牌嘅狗仔，就第一時間抱狗狗返屋企，同佢沖涼又餵狗糧，跟住佢喺微博上呼籲大家幫忙搵番狗仔嘅主人，如此有愛心嘅表現，試問有邊個男人會唔愛上佢呢？
仲有，阿妹現為大學二年級學生，平日既忙於模特兒工作，同時又要兼顧學業，真係辛苦晒！至於嗜好方面，佢最愛潛水，早前佢就去咗越南潛水喇。講到近況，佢現忙於籌備旅拍工作，將會到日本取景拍攝，在此預祝阿妹拍攝順利，拍多啲好嘢畀大家睇啦！
出生地：重慶
身高：168cm
三圍：35、25、35
簡介：猩一除咗同大家分享佢嘅迷路瘀事之外，當然仲有好多生活點滴同工作花絮開心「些牙」，想了解佢多啲，就要緊貼佢嘅微博啦！
網址：http://weibo.com/hjyamber?is_hot=1
撰文：魂