政情：查旺角暴亂 議員為拗而拗
唔經唔覺，造成近百名警員受傷嘅旺角暴亂，已經發生咗成四個幾月，公眾嘅注意力早已轉移去林榮基爆料及最新嘅迷你倉大火。不過，同特區政府一樣後知後覺嘅立法會，拖到近兩日先至正式辯論暴亂事件，泛民主派繼續將暴亂責任歸咎政府嘅小販政策及整體管治問題，建制派就圍插泛民煽動及助長暴力，表決結果當然又係得個吉。
班議員成日都話唔夠時間審議佢哋認為重要嘅撥款和法案，對於呢類明知係立場壁壘分明、無可能傾到任何共識同結果嘅議題，唔該以後都唔好攞上會議廳嘥時間討論喇，大家喺立法會外面掘幾舊磚頭，互掟分勝負好過啦！
王國興轟議案荒誕
立法會前日下午開始辯論引用《立法會（權力及特權）條例》調查旺角暴亂議案，議案本來係喺暴亂發生後無耐就提出，但受到泛民拉布影響，拖到現屆立法會將近收爐先辯論。尋日發言嘅議員以建制派居多，其中工聯會王國興炮轟今次議案係「沒有最荒誕，只有更荒誕」，批評支持議案嘅泛民議員只想煽動暴力及搗亂議會。議員蔣麗芸亦直斥泛民要求調查事件係有政治目的，專責委員會一旦成立亦只會淪為「口水會」，為暴徒嘅暴行開脫。
漁農界何俊賢質疑泛民把口就話想調查暴亂成因，其實係想轉移公眾視線及將責任推給政府。進出口界黃定光更翻舊帳，指泛民早前就預算案提出修訂要求削減消防處開支嘅議案，問泛民點對得住依家喺火場奮力撲火嘅消防員。勞工界鄧家彪就指出，其實泛民如果真係想調查事件，大可透過二十名議員站立要求成立專委會嘅方式進行，但泛民無做到，證明私底下根本唔想查出事件真相，以免最後令自己尷尬及失去市民支持。
各持己見 互相卸責
泛民方面，教育界葉建源就死撐成立專委會有助找出事實根源，從而令政府正視管治及民怨問題。會計界梁繼昌質疑警方就暴亂成立的檢討委員會不全面，認為應該成立法定嘅獨立調查委員會。喺雙方各持己見、互相卸責下，議案一如所料遭到否決，兩日夾埋白白浪費接近七個小時嘅會議時間。不過，咁都好嘅，如果真係通過成立專委會調查旺角暴亂，將會浪費嘅時間和公帑肯定比依家再多幾十倍。