中環出更：漢奸黎海空着草避仇家
得罪人多、稱呼人少嘅壹傳媒黎智英（漢奸黎）周街都係仇家，多到唔知邊個打邊個，其位於何文田大宅及將軍澳壹傳媒大樓近期幾乎日日都有團體踩場示威「追債」，加上捐款醜聞纏身，可以話無餐安樂茶飯食，唔怪得佢話要退休啦！話口未完，尋日下午又有多批團體先後到漢奸黎大宅示威，而漢奸黎就晨早九點幾鐘就坐遊艇出咗海，直到下午示威活動完結後先返屋企，話佢唔係出海避風頭都無人信喇！點知到咗夜晚，佢仲索性執埋一箱二箱行李搭飛機離港，真係名副其實「棚尾拉箱」走人喇！
尋日朝早九點幾鐘，漢奸黎同一位外籍男子乘座駕前往西貢遊艇會。漢奸黎全程帶住鴨舌帽，頭耷耷咁上遊艇出海，一直到下午近五點先上岸。兩人在遊艇上成八小時，唔知共商咩大計呢？又係咪密謀攪局呢？
執定包袱 落荒而逃
漢奸黎一直被公認為前年佔領行動嘅「幕後黑手」兼泛民主派嘅最大「金主」，佢喺前年佔領行動中曾被預約拘捕，被指涉嫌組織及參與非法集結兩項罪名，但至今仍未「落鑊」，加上壹傳媒業務全面倒退，近日佢仲自爆要退休，又異常頻頻坐遊艇出海，種種迹象難免令人聯想佢有意學定坐艇，有朝一日會執包袱坐艇落荒而逃。
到底有咩示威活動搞到漢奸黎一早出海避風頭呢？尋日中午時分，就有廿幾名示威者手持「誨淫、誹謗耍黑金，毒果害人昧良心，司法懲處要認真！」、「黎智英，黑金害社會，誹謗累企業」、「黎智英害人精，搞到社會無安寧」等橫額及標語到漢奸黎大宅外抗議，要求司法機構認真懲處黑金事件，當中更有部分示威者自稱係買咗霸王股票嘅股民添！
直至下午三時左右，有另一批示威人士自發去漢奸黎大宅，同樣有廿多人手持標語有備而來，指斥漢奸黎「黎狗無恥」、「流氓傳媒失信於民」。近期日日都有人踩上門，難怪漢奸黎要出海避風頭喇，尋晚佢仲執埋一箱二箱行李，同神父朋友搭飛機離港。不過避得一時、唔避得一世，早知今日，又何必當初！
卓妮