政情：葉劉自爆去愛女畢業禮唔知醒
立法會議員葉劉淑儀上星期出席愛女葉榮欣喺美國史丹福大學嘅雙碩士畢業禮，包括工商管理及教育兩個碩士，呢啲開心事當然要放上社交網站同人分享啦！不過，葉劉除咗分享喜悅，竟然自爆當日差啲錯過愛女嘅重要時刻，到底搞乜咁大頭蝦呢？
舟車勞頓瞓到「昏迷不醒」
話說葉劉上星期五抵達三藩市，翌日早上就要出席愛女嘅畢業禮，但可能葉劉搭完十幾個鐘頭長途機太舟車勞頓，竟然「甩轆」瞓過龍，佢更形容自己瞓到「昏迷不醒」添！好彩愛女見葉劉遲遲未見人，好醒目咁去大力拍打酒店房門先叫得醒佢，如果唔係實會錯過畢業禮，相信會成為佢一大遺憾！
葉劉因為遲起身，搞到梳洗時間大大縮短，要匆忙出門口。不過，唔夠時間扮靚靚，都比錯過畢業禮好，況且愛女先至係主角，但見佢同愛女啲合照整整齊齊，都唔似好匆忙啫。