政情：網站惡搞香港歸英呃Like
近年唔少香港人都關注香港前途，香港獨立同回歸英國係其中兩項提議。有疑似惡搞網站可能睇穿部分港人心意，喺前日上載有關香港回歸英國嘅報道，引來唔少網民討論同讚好。該網站仲有其他國家嘅報道，佢哋製作認真，又圖文並茂。但正所謂「認真你就輸了」，網上資料一向都幾可亂真，大家不妨睇多幾個網站，提高警覺，以免受騙。
網站East Asia Tribune嘅報道以「China Announces Plan To Hand Hong Kong Back To Britain By End-2016」（中國宣布打算於二○一六年底把香港交回英國）為題，內容指出，中共嘅政治局常委代表前日早上喺北京人民大會堂向記者宣布，香港將於二○一六年底回歸英國。報道更引述該代表解釋，有呢個決定嘅主因係過去兩年香港不斷發生抗議同暴力事件，又認為香港市民嘅一連串民主抗議活動，顯示佢哋不滿成為中國嘅一分子。所以中央承認香港市民嘅訴求，接受佢哋回歸英國。報道仲透露，依家未有確實回歸日期，中方仲同英方商討。該報道仲有埋證券分析師同市民回應，睇落都幾認真喎。
報道上載後，有唔少網民都讚好，不過唔知佢哋係咪真心讚好喇！亦有網民醒目，留言「If the sun rose from west」（如太陽從西邊升起），暗指報道係假。