政情:停建居屋遺禍 曾蔭權遭狠摑

香港回歸十九年,樓價同市民負擔能力仍然脫節,三名特首對此責無旁貸,其中前特首曾蔭權爵士於任內決定停建居屋,更係埋下市民上車難嘅惡果。現年六十四歲、出任公屋聯會主席超過廿年嘅王坤,於退休前夕回顧自己同三名特首就房屋問題交手嘅經歷,炮轟曾蔭權係「萬金油特首」,頭痛醫頭腳痛醫腳,有次仲遇上對方「唔啱聽即黑面」嘅一面。曾蔭權離任近四年,當年房屋政策失誤嘅遺害仍然歷歷在目,被狠摑一巴似乎係自然不過嘅事!

明年三月退休嘅王坤,以公屋聯會名義編寫咗一本名為《走出香港住屋迷思》嘅書籍,記錄本港多年來嘅房屋問題,而觸發佢哋出書嘅係早前免費電視台亞洲電視執笠︰「如果執咗就會冇晒紀錄,希望搵番資料同回憶。」

王坤尋日爆料指,自己於二○○二年任房屋委員會策劃小組委員會委員時,曾經同時任政務司司長嘅曾蔭權交手,佢哋喺一個會議上討論停售居屋問題,當時佢當面向曾蔭權指出,政府單方面要求停售居屋係違法,應該先經房委會討論,直斥曾蔭權有關做法屬於越權。不過,據引述曾蔭權當時稱︰「依家沉緊船要立即解決」,王坤話從呢件事可見曾蔭權「唔啱聽即黑面」嘅性格。

王坤臨走 鬧爆三任特首

對於首任特首董建華同現任特首梁振英(CY)於房屋政策嘅表現,王坤形容董建華有「房屋恐懼症」,當年「八萬五政策」後,已經對房屋問題隻字不提,而CY就係「講咗當成功」,王坤坦言,自從CY於數年前上任後,公屋上樓時間就愈拖愈遲。問及會否支持CY連任,王坤直言唔贊成,原因係CY「唔老實」,亦對個人僭建醜聞死唔認錯。

除此之外,王坤又憶述香港房屋發展歷程,直指香港咁多年嚟發生過三大公屋醜聞,包括八十年代嘅廿六幢公屋結構危機、一九九八年嘅公屋短樁醜聞,以及去年發生嘅鉛水事件。佢有感而發指,自從問責制早年實施後,政府官員問責反而更「揸流攤」,好似鉛水事件,竟然冇官員需要負上個人責任、問責下台。

話時話,港府高官於房屋政策一直未見新猷,而且將現存問題愈滾愈大,難怪王坤於過去十多年都火氣十足,持續鞭撻政府主責官員回應市民於住屋方面嘅訴求。

第一手消息請下載on.cc東網iPhone/iPad/Android/Windows Phone Apps