鉛水事件報告日前公布，直指相關政府部門及持份者集體失職，之不過去到林鄭月娥嗰度，卻變成「制度犯錯」，至今沒有一個官員須問責下台。香港係高官嘅真正福地，有鑊唔使孭，更可以理曲氣壯，聲大膽大夾冇準；難怪有苦主怒轟：「無人要負責任，咁我係咪要負責任，因為我唔小心飲咗你啲水！」市民周先生則說：政務司司長唔係監管個制度嘅咩？點解會由得個制度腐化？點樣責無旁貸？
市民鬧得有理，烽煙轟林鄭「官到無求品格衰」，而本報「正論」亦一語道破冇靈魂嘅政府混吉度日：「鉛水報告遮羞布，官到無良膽自大」。林鄭為一眾失責高官護短，依老朽看，已經去到「性本賤」嘅地步，人至賤則無敵，皆因賤到某個程度，不會受外界環境影響而改變，一賤到底，就可以妄自亂來，亦不會深思孔子所說的「君子有三畏：畏天命，畏大人，畏聖人之言」，林鄭的膽大已超然物我，見佛不是佛，見鬼不是鬼，見到自己至賤都係真理！
阿姐，調查委員會點名狠批的水務署署長林天星，一意孤行拒驗「頭浸水」，水務署不但求求其其驗水，還給予鉛水邨嘅毒水「優質供水計劃」認可，如此埋沒良知良能，完全不理市民健康死活，林鄭竟斗膽話係「制度犯錯」？至於房委會、房屋署，不論在監管或行業層面均有不足，試問部門集體失職至令人慘不忍睹，又豈是林鄭一句「制度問題，無人須負責」，膽大的說了算！
講真，政務司司長監管整個政府制度，唔落台至少扣減半年人工喇！水務署署長林天星敷衍塞責，理應問責下台以息民憤；至於房委會、房屋署有關官員，若查實瀆職者，亦應紀律查辦，如此才能服眾，亦證明特區政府聞過即改及為市民提供優質服務之決心。一味推卸責任，香港只會沉淪至萬劫不復。