獨立調查委員會喺今個星期初公布鉛水報告，狠批各部門監管不力，身兼房委會主席嘅運輸及房屋局局長張炳良當然責無旁貸啦，可惜各部門最後以「制度性問題」為由集體卸責，無官員需要問責，認真離譜！不過，更離譜嘅係，報告公開僅僅四日，政務司司長林鄭月娥已經率先出訪美國，而今日就輪到張炳良啟程去歐洲訪問八日，分別會到希臘、法國及西班牙，行程豐富猶如遊埠一樣。睇嚟班高官除咗集體卸責，仲會集體遊埠喎，受害居民飲鉛水真係有冤無路訴，就嚟連香港都會六月飛霜呀！
