中環出更：妙用沙膠 名人擦出回憶
講起「沙膠」，學生哥時代嘅回憶即刻湧現，但原來沙膠並唔係用嚟擦原子筆字，即係話咁多年嚟唔少人一直都用錯咗！咁沙膠到底有乜用？卓妮尋日喺沙田馬場見到香港青年工業家青委副會長許穎嘉（Candy）同老公何兆剛（William），原來佢哋今時今日都經常用沙膠，不過唔係擦原子筆字，而係攞嚟擦鞋！
早前有外國媒體報道，指沙膠藍色部分其實都係設計嚟擦鉛筆字，只不過唔係擦普通紙張，而係擦卡紙或木紋紙等較粗糙嘅紙。不過沙膠用途又豈止咁少，本身經營衣物護理公司嘅William就話，麖皮鞋污糟咗，都可以用沙膠輕力擦走，夠經濟之餘又可以減少使用化學清潔劑。佢又教路如果水性或液體污漬可以用濕布輕抹，但油性污漬就焗住要用化學品喇！佢仲話唔同材質要用唔用物料清潔，學問大不同，沙膠只係適合擦麖皮，如果其他皮類就要用「生膠」，但生膠唔係周圍有得賣，沙膠亦愈來愈難買到嘞！
余偉傑與時並進體會深
同場仲有康泰旅行社董事長黃士心兒子黃進德（Johnny），喺銀行工作嘅佢一聽到沙膠就問「沙膠？乜嚟o架？」諗一諗先記起自己都有用過，不過佢就醒目喇，見用用吓唔對路，擦到紙都穿窿咁滯，一早就冇再用。
裕華國貨董事總監余偉傑就唔係沙膠年代，而係用塗改液同塗改帶嘅，講起沙膠不知不覺被淘汰，正為國貨公司年輕化嘅佢就話最近升級緊公司電腦系統，猶記得當年佢哋係全港首間用條碼系統處理貨品的公司，嚟緊國貨都一樣要與時代並進咁話。
卓妮