香港律師會向來被視為親建制，但自從前會長林新強喺一年前被拉下台後，接任會長嘅熊運信就一直都慎言慎行，甚少就政治敏感議題發表意見，以免被親泛民主派嘅律師會員乘機攻擊。
律師會理事會前晚進行改選，有八位候選人競逐共六個空缺，結果兩名被指親建制嘅人選，包括身兼濟南市政協嘅陳澤銘，以及當年曾力撐林新強嘅湯文龍，雙雙順利當選，大有親建制勢力大反擊嘅意味。
其餘四名新當選嘅理事，有一位係角逐連任、一位來自律師會轄下嘅年青律師組，另外兩人則來自外資律師行。至於唯一被視為親泛民、曾公開反對「一國兩制」白皮書嘅高恒就落選，反映律師會將繼續以親建制、大行同外資行為主流，泛民勢力暫時未能入侵。
不過，亦有分析指，泛民一向喺法律界佔優，如果要全力搶攻，應該唔難攻陷律師會，但其實律師會絕大部分工作都同政治無關，尤其理事會公務繁忙，根本無乜泛民律師有興趣做。
改選後嘅理事會稍後將選出新一屆正副會長，之前盛傳會卸任嘅熊運信，到前晚都未有明確表態，唔通佢睇完今次改選結果後，對自己嘅去留有新諗法？