政情：彭耀佳提最低工資又辣火頭

喺實施最低工資後，勞資雙方近年就強積金對沖機制同埋標準工時等問題搞到水火不容，都唔知點收科？尋日卸任香港總商會主席嘅彭耀佳，喺出席周年大會前大談香港目前嘅營商環境，代商界發聲評論唔同嘅勞工議題，更主動提起最低工資，莫非商界又想再辣多個火頭，殺勞工界一個措手不及？

彭耀佳話受經濟下行壓力同種種法規嘅影響，商界嘅經營成本有增無減、百上加斤、叫苦連天咁話。其後，佢更點名提及最低工資委員會，認為委員會必須要避免習慣性向上修訂最低工資水平嘅行為，否則有機會帶嚟不可估計嘅嚴重經濟後果。咁講法，即係商界只會維持現有水平同埋下調呢兩個選擇，勞工界肯定唔會認同喇！

點解喺呢個時候提及最低工資？係咪暗示商界想借最低工資做籌碼，再喺其他更具爭議嘅議題上討價還價呢？