政情：胡志偉戴定頭盔踩車防擦傷

涉及單車嘅意外經常發生，而曾經踩單車返工嘅立法會議員胡志偉，更試過踩單車畀車撞！但佢話事件係好多年前喺美國發生嘅，更強調意外係因司機無開車頭燈所引致，搞到好似拍戲咁碌過私家車車頭，好彩當時車速唔太快，只係擦傷啫！

曾經踩車致傷嘅胡志偉每次都會做足保護措施，好似戴實頭盔防沙石刮傷，又會做足手勢畀其他司機睇。佢仲話近年司機對單車友嘅態度有改善，起碼唔會特登搞到單車友失平衡，睇嚟大家都開始習慣馬路有人踩單車喎。

由於工作忙碌，胡志偉已經少咗踩單車，但立法會辦公室內仍然長放單車。佢亦都試過落區工作後，由秀茂坪踩到觀塘搭船過海，再由北角踩返立法會，真係夠晒環保同健康！

不過佢就乘機吐苦水，指香港嘅單車徑多路障，踩得唔夠暢快，仲建議政府開放次要道路畀人踩單車。唔知政府會唔會考慮吓呢？