政情：爛破港台漏水 Greg蘇懶理

造價太貴被指大花筒

政府前年年初已向工務小組申請逾六十億元嘅撥款，用作興建港台新大樓，惟當時因為造價太貴被建制泛民同聲反對，指摘係大花筒，之後就算「減磅」七億元，仍不獲支持。當時議員就要求，Greg蘇重新諗過一個方案送返去工務小組審議，但至今冇晒下文。

話說尋日紅雨打孖嚟，香港電台電視大廈同廣播大廈都出現漏水嘅情況，電視大廈三樓嘅剪片房天花板漏水，仲搞到機器淋濕，員工要用水桶載水。廣播大廈同樣災情嚴重，直播室外漏水，小部分假天花更加塌下，由於非常靠近伺服器房間，員工都好擔心會影響廣播服務，即刻叫人搶修。

港台發言人話當時係因為廣播大廈一個露天平台進行防漏工程期間，突然出現暴雨，令天花出現漏水。佢話工作人員已即時抽走積水同補漏，強調並無影響廣播服務。

大罵興建「未聞樓梯響」

港台節目製作人員工會尋日就發聲明講漏水問題，順便大鬧政府拖延新大樓方案。聲明話港台員工自接手亞視模擬頻道之後，工作比兩年前多，但工作環境就日漸惡劣。工會又批評興建新大樓一事絲毫冇進展，甚至係「未聞樓梯響」，要求政府盡快提出方案，如果唔係再拖延落去，就會令成本增加，更難爭取工程上馬。

究竟新大樓有乜進展？根據政府上個月於預算案嘅書面回覆中就話，由於研究過程中所遇到嘅問題比預期複雜，港台需要多啲時間處理，又話會有機制跟進。咁即係點？簡單啲講就係遙遙無期囉！