中環出更：梁美芬話青年爭申BNO「好傻」
近來香港社會有唔少有關身份認同嘅討論，特別係本土民主前線梁天琦被揭發喺內地出世後，更掀起起底潮，而立法會議員梁美芬日前接受電台節目訪問時就承認曾經申請「英國屬土公民護照」（BDTC），仲話有啲年輕人情願揸英國國民（海外）護照（BNO）「好傻」，事關BNO唔係一個國籍，反而會令人變成人球。
梁美芬日前接受電台訪問時談及身份認同，被問及回歸前嘅特殊證件可以出入英國屬土，係咪國籍嘅表現時，佢形容呢個係美麗嘅誤會，又承認自己有申請過「英國屬土公民護照」，但佢話有呢本護照唔代表可享公民權利，入境時仍可能要申請簽證，形容只係旅遊證件嚟啫！喺嗰個年代，港人都係揸BDTC出外。
指中國護照愈嚟愈吃香
佢又話依家有啲人將香港人身份高度政治化，又抗拒中國人身份，咁樣係好傻，因為雖然大家將大部分港人持有嘅「中華人民共和國香港特別行政區護照」，但唔等如無咗中國人身份，其實都係中國公民。佢重申，自己只持有特區護照，未有其他國籍嘅護照。
對於有啲年輕人寧願揸BNO，梁美芬就話BNO唔係一個國籍，反而會令人變成人球，反而中國護照就愈嚟愈吃香，佢更有移民南非、攞咗外國護照嘅內地朋友，特登花幾十萬元，去領取番中國護照咁話。
卓妮