中環出更：保良壬子會遊台讚平靚正
近年台灣成為香港人外遊嘅熱點，由保良局歷屆董事會成員組成嘅保良壬子會早前亦組團去南台灣玩足四日三夜，團友包括壬子會主席劉陳小寶、副主席鄭錦鐘（Eric）夫婦同前總理張心瑜（Fiona）等廿幾人。講起今次旅程嘅趣聞，Eric同Fiona不約而同提到餐廳提供嘅分量超勁，訂一萬蚊港幣一圍枱嘅餸菜，竟然夠晒兩圍枱人食，可見台灣物價真係平到笑，商家亦夠晒老實唔欺場，但就食到大家攬住個肚嘞！
Eric話今次佢哋去咗台灣墾丁同高雄玩，一場嚟到，梗係要去寶島最南端嘅鵝鑾鼻燈塔行吓，同埋享受當地著名嘅海鮮。一向鍾意食海鮮嘅Eric讚螃蟹好好食，同香港海鮮一樣咁有水準，價錢就梗係平好多喇！台灣一向多手信，Eric第一次見黑衣嘅黑金剛花生，話好食又得意。期間佢仲買咗台灣製造嘅偏光太陽眼鏡，每副盛惠一百蚊，價錢只係香港有售同類黑超嘅七分一。
客家人張心瑜未聽過擂茶
Fiona就覺得客家擂茶好新奇，事關佢係客家人，但從未聽過擂茶呢種美食。今次一行人落手落腳搓擂茶，將黑白芝麻、紅豆同糙米等材料研磨成粉末，然後用茶水沖泡嚟飲，好味又健康。同行仲有保良局副主席陳細潔、前主席陳亨利太太陳趙滿菊（Joise）同前總理姚蘭玫等人。Joise盛讚當地休閒鞋平靚正，佢一口氣掃入十二對，大呼過癮。
卓妮