被立法會政府帳目委員會強烈譴責嘅民航處處長羅崇文，政府尋日公布佢將會喺本月十九日退休。公務員事務局局長張雲正話，羅崇文喺政府服務近四十年，積極參與發展香港成為一個國際航空中心及空運物流樞紐，祝佢退休生活健康愉快，但當中隻字都無讚過羅崇文。正所謂「面就人哋畀，架就自己丟」，羅崇文任內浪費公帑興建豪華民航處總部，購置新空管系統又搞到一鑊泡，劣迹斑斑，連政府都話要調查，簡直係令公務員隊伍蒙羞。如果張雲正咁都讚得落，真係惹起公憤都有份！
