中環出更：黃傑龍食蟲方知蔬菜好
香港醫療專業人士協會（醫專會）日前舉辦世界米芝蓮廚神綠色晚宴，推動可持續美食。卓妮見到叙福樓集團執行董事黃傑龍（Simon），講起可持續食物，佢話日前返家鄉廣東番禺勇食禾蟲蒸蛋，但食食吓大廚先話佢聽，禾蟲旁邊嘅唔係蒸蛋，而係啲禾蟲爆出嚟嘅漿狀內臟，聽到當堂無晒胃口，仲感慨如果人類將來唔想食蟲維生，依家就要食多啲菜喎！
話說Simon早前喺創投網站見到有人研發養蟲瓶，稱蟲係一種可持續食材，假如將來人類無晒其他食物，可能要食蟲，依家外國仲真係有人養蟲當食品。講到要食蟲救地球咁嚴重，Simon就趁返家鄉時膽粗粗一試，佢坦言味道唔錯，但始終過唔到心理關口，笑言唔想食蟲過世，惟有快啲養成多菜少肉嘅飲食習慣。
其實除咗食蟲，貝殼類海鮮嘅可持續性都好高，世界自然基金會香港分會企業事務總監黃碧茵話，佢哋有個海鮮分類指引，區分市面上七十幾種海鮮，市民跟住個表選擇就可以避免對生態造成嚴重影響。至於蛋撻王行政總裁莊任明就鍾意自行種植，家中種嘅蔬菜超過十多種，每年夏季嘅食材都可以食到十幾日。
蔡加敏健康自製蔬果乾
當日晚宴邀請到九位來自瑞典、丹麥、法國及本地等星級大廚炮製可持續菜式，馬會大董葉澍堃、「玩具大王」蔡志明太太蔡李惠莉及女兒蔡加敏都有出席。蔡加敏話近日買咗個乾果機，自製蔬果乾畀小朋友，以減少進食垃圾食物。醫專會主席江明熙就話，醫生平日除咗診症，都好關注下一代健康，希望透過推廣可持續食材喚起大眾關注環境問題。
卓妮