政情:樹根激光美容 改賣樣

立法會換屆選舉在即,各方都密鑼緊鼓籌備選舉工程,除咗落區宣傳,有人已開始進行形象改造工程。立法會議員鍾樹根面對香港島削減一個議席,分分鐘與黨友甚至其他建制派成員攬炒嘅局面,最近不惜工本大灑金錢改造形象,最意想不到嘅係,佢去美容院進行激光美容療程,務求達到去皺紋同V面嘅效果,莫非佢想改行偶像派路線?

太太做選戰「扮靚軍師」

立法會香港島議席由七席變六席,有傳新民黨、工聯會、樹根所屬嘅民建聯(民記)各不相讓,若民記照出樹根同張國鈞兩張名單,原有兩個議席只能保一個,最壞嘅情況更可能攬炒。外界一直關注佢哋點樣爭出線,最近聽聞樹根為迎戰選舉,喺太太指導下化身成「美容達人」。

樹根透露,佢要外樹形象,最緊要係執走殘樣同減肥,而單係喺美容院進行一個名為HIFU高能聚焦超聲刀嘅療程,用作拉皮同瘦面,每次盛惠數千元,短短兩次就使咗近萬元。佢又話,激光打喺塊面上感覺似畀針拮,不過眼部嘅皺紋明顯減少,臉形亦開始變V,所以話貪靚肯肯定需要付出代價。

天后誕派蛋 食足一周

除咗每隔一段時間就要去美容院做療程,樹根透露每星期有三至四天需要敷面膜,又強調面膜唔係便宜貨,每塊價值八十元。

佢笑話太太喺呢方面好孤寒,唔肯每人每次用一塊面膜,所以每次都係將自己敷完嘅面膜畀佢用。問到咁樣循環再用面膜會唔會好暖同唔衞生,佢就話會用面膜嘅另一面,但其實面膜都係佢用錢買,唔明白點解要咁慳,真係「I don't think so囉!」

至於實質宣傳工作,樹根話已將過去撰寫嘅文章結集成書,印製數千至一萬本。此外,佢買咗大型廣告板、小巴同的士廣告,又拍攝咗宣傳片,為此已增聘人手負責改圖同美圖,淨係上述工作累計已使近一百萬元。

佢重申,所有宣傳費用都係自掏荷包,所以最近都要節衣縮食,除咗兩夫婦共用一塊面膜,連早前天后誕派發嘅紅雞蛋都唔放過,放喺屋企雪櫃食足一星期,真係慳家。

第一手消息請下載on.cc東網iPhone/iPad/Android/Windows Phone Apps