政情：鄭泳舜請暑期工怕港孩
僱主同正職僱員最怕暑期工玩失蹤！區議員辦事處每年都會提供部分名額予未畢業嘅大學生做暑假工，其中深水埗區議員鄭泳舜（Vincent）都唔例外，佢透露，每逢暑假均有世叔伯介紹仔女到其議員辦事處做暑期工，但試過有人覺得工作性質同期望有好大落差，做幾日就突然消失咗！咁樣聽落，都相當港孩喎！
唔慣從政要派單張
Vincent話深水埗係基層區，請到嘅暑期工唔係好習慣要行七層樓梯，又要落街派單張，覺得從政做乜要落街派單張，甚至認為呢啲嘢唔應該係佢哋做，為此，Vincent依家都會同介紹人講清楚，呢份工要做乜，亦要申請人承諾做到幾多先會請，以免為同事帶來不便。
不過話雖如此，Vincent都試過請到幾有心嘅暑期工，有次有一名來自科技大學嘅商科生，明知自己畢業唔會做呢行，暑假都嚟試吓從政到底係點喎。