中環出更：施子清教仔沉默是金
日前有團體舉辦「沒有巴掌日」，促請政府立法全面禁止體罰兒童，多名政商界名人都明言體罰絕對冇用。卓妮喺馬場遇到福建幫頭領施子清，原來佢教小朋友有自己嘅一套，佢話自己教仔一定唔會用體罰，反而有一招萬試萬靈嘅絕招，就係唔睬佢哋喎！
點解唔睬佢哋，反而係絕招呢？施子清話小朋友唔聽話嘅時候，就會唔睬佢哋，咁樣就會等佢哋知道自己做錯，等佢哋再過嚟道歉嘅時候，就會同佢哋講番，到底佢哋錯喺邊，小朋友就會明白o架嘞，唔需要體罰嘅。
施榮懷指體罰傷感情
施家四位公子尋日齊人陪爸爸媽媽入馬場。二仔、中華廠商聯合會永遠名譽會長施榮懷話，自己都係同爸爸用同一套方法教小朋友嘅，仲話體罰冇用o架，只會整傷小朋友，亦會令到父母同子女之間嘅關係冇咁親密添！至於細個做過乜嘢激嬲媽媽呢？佢就話唔記得啦，依家就錫晒媽媽，每個禮拜都會陪媽媽飲茶。
轉頭見到馬會大董、創興銀行副主席兼董事總經理梁高美懿（Margaret），佢都話自己唔會體罰小朋友，仲話幾忙都好，都會抽時間陪佢哋。佢又憶起，自己初時做銀行嘅時候，職位冇咁高級，好彩上司體諒，可以帶啲嘢返屋企做，佢就會早啲返屋企，陪小朋友做功課同食飯，等小朋友瞓着之後，先至做嘢，仲話教小朋友最緊要係以身作則，因為小朋友都會學父母o架。佢又笑指喺小朋友面前，自己通常係做忠嘅，奸嘅留番畀老公做喎！
卓妮