政情：徐珊雯轉攻平價鐘錶市場
曾經受惠於內地客一擲千金豪買名錶嘅鐘錶業，現時成為經濟冰封期嘅重災行業。香港鐘表業總會副主席徐珊雯（Elise）認為，市場對貴價錶嘅需求少咗，但係售價一至三千元嘅錶則大受歡迎，所以佢最近改變策略，入股法國時尚名錶品牌，冀藉着呢個主打售價五千元以下嘅老牌子，於零售寒冬中闖出一片新天地。
Elise對市場樂觀以待，認為依家貴價錶少人買，咁咪做多啲平價錶囉，只要跟隨市場需求嘅經濟定律實無錯。Elise仲話，睇番現時市況，錶無得做啫，但係鐘有得做，所以佢亦代理以梵高名畫為主題嘅鐘。佢分析話，隨着內地人嘅生活品味提高，對此類具收藏價值嘅家居擺設需求亦會增加。聽Elise咁講，鐘錶界都唔使太灰心吖！