若要人不知，除非己莫為，民政事務局常秘馮程淑儀爆出樓換樓醜聞後，大話連篇，瞞得就瞞，點知愈描愈黑，愈揭愈臭，簡直醜態百出。
係咁嘅，馮程淑儀被踢爆兩年多前同賭王三太嘅胞妹陳婉玉進行離奇換樓交易，從中獲利至少數百萬元，涉嫌官商勾結、利益輸送，佢一味死撐，仲話唔知賣家係陳婉玉添。事實又係點嘅呢？原來馮程淑儀嘅丈夫馮永業曾經代表陳婉玉嘅公司簽署樓宇買賣文件，證明兩人唔止認識，而且關係非比尋常，馮氏夫婦居然話唔知換樓交易嘅主角係陳婉玉，咁仲唔係擘大眼講大話！
正如古人話齋，不近情者多藏奸。現任機管局企業發展總監嘅馮永業曾經擔任港府高官，喺佢主理航權同直升機機場擴建事務期間，陳婉玉擔任直升機公司嘅股東同行政總裁，佢哋唔止公務關係千絲萬縷，私人關係更加耐人尋味。呢單醜聞愈揭愈多黑幕，如果話當中冇蠱惑，細路仔都唔信喇。
唔知係咪心虛冇面見人，馮程淑儀尋日鬼鬼祟祟拖篋離開住宅，連手上嘅結婚戒指都消失埋，唔通佢想避世？其實，避得過初一，避唔過十五，與其遮遮掩掩，不如坦然面對。廉署已正式立案調查，足以證明呢單醜聞疑點重重，馮程淑儀咪以為潛水就可以甩身吖。內地有項獵狐行動，專門對付外逃貪官，睇嚟港府亦應該倣效，唔好畀嗰啲以權謀私嘅高官逍遙法外吖。
話時話，呢單醜聞引起社會嘩然，廉署固然要做嘢，港府亦唔可以置身事外。有政黨就講得啱嘞，連串證據反映馮程淑儀已經喪失高級公務員應有嘅公信力，繼續行使職權難免影響市民對公僕奉公守法嘅信心，佢應該即時停職，直至廉署完成調查為止。冇錯嘞，民無信不立，官無信不威，港府繼續容許醜聞高官佔據要職，等於自絕於民嘅咋。
講開又講，馮程淑儀兩公婆做官唔叻，最叻以權謀私，尤其炒樓更有一手，唔怪得被人稱為「金童玉女」喇。喺呢單換樓交易中，馮氏夫婦連稅款勁慳二百萬至四百萬元，而且由於冇向當局申報打通相連單位，可能多收最高一萬二千元差餉寬免，簡直舔到盡。仲有吖，佢哋轉手就將有關豪宅單位放盤，最高標價五千八百萬元，如果成功售出，短短兩年就勁賺三千萬元，大家話嘞，佢哋似官員定似炒家吖？
都係嗰句喇，物以類聚，人以群分。馮程淑儀被視為前特首曾蔭權爵士嘅愛將，有咁嘅上司，自然有咁嘅下屬，當年曾爵士被譏為「氣候逃犯」，唔通馮程淑儀亦想試吓做「逃犯」嘅滋味？