政情：曾憲康「靚聲」 差啲做DJ
政壇中人來自五湖四海，好似立法會議員陳志全以前做過DJ（唱片騎師），工聯會議員黃國健就曾經行過船，足迹遍布世界，東區區議員羅榮焜任職電視螢幕宣傳主持。原來屯門區議員曾憲康做議員之前亦做過配音工作，雖然時間唔長，但佢透露當年差啲入咗香港電台做DJ，但陰差陽錯下未有再面試，輾轉加入民建聯（民記）並做埋區議員。
天生擁有一把磁性腔調嘅曾憲康話，自細就鍾意模仿電視台啲人講嘢，中三時仲膽粗粗同同學一齊去港台應徵做DJ，佢笑言當年十五歲都未夠，但港台面試官仍然承諾，假如佢年滿十八歲後仍然想做DJ，再去面試就會請佢，但佢「夠秤」後就冇再返港台面試，DJ夢結果不了了之。曾憲康後來參加廣播課程，仲為幾套賣埠嘅旅遊節目配音。
巫成鋒慨嘆對立「冇朋友」
已經連任第二屆區議員嘅曾憲康有份提攜黨內「新丁」、去年擊敗民主黨陳樹英當選屯門區議員嘅巫成鋒；而今年三十歲嘅巫成鋒坦言，部分年輕朋友知道佢加入民記後都慢慢疏遠佢，慨嘆社會對立蔓延到連做朋友都要分黨分派。