早前民建聯立法會議員李慧琼辭任行政會議成員，交由黨友立法會議員葉國謙（阿謙）接替行會成員一職。不過，原來阿謙出任行會成員就留有手尾跟，皆因行會係逢周二早上開會，同立法會行政管理委員會（行管會）嘅開會時間撞咗，本身係行管會成員嘅阿謙竟然要其他十二位行管會成員遷就佢，更改會議時間。唔通佢以為自己「升呢」做行會成員就有超然地位？
行管會下周開始就會改為喺星期一早上開會，呢個安排就係因為阿謙擔任行會成員而起。既然阿謙要開行會，點解仲要攬住行管會個位唔放？不交由黨友加入行管會開會？阿謙就話，因為佢係建制派同泛民主派嘅協調人，而且行管會嘅事項有時要好快做決定，加上行管會得番幾次會，換人就要喺內務委員會投票，所以費事搞咁多嘢。佢仲話，有建議過大家可以喺周二早上提早兩個鐘開行管會，只係大家都唔想咁早開會，所以先改為星期一開會喎。
正因為行管會要改時間開會，議員陳家洛就成為其中一個「受害者」，皆因佢逢星期一朝早都要返大學教書，佢話冇理由丟低啲學生，所以惟有缺席行管會。其實行會已被批評淪為「舊電池」收容所，不如阿謙缺席行會好過啦！
卓妮