中環出更：鄭承峰履新 大計弘善業
仁濟醫院董事局尋日舉行換屆就職典禮，新任主席鄭承峰（Baldwin）在卸任主席林煒珊（Vanessa）手中接棒，數百賓客齊去見證。Vanessa任內共籌得善款達一億六千萬元，雖然唔夠上一屆多，但在經濟不景的大環境下，成績已經算唔錯。Baldwin新上任就滿腹大計，話未來一年將竭盡所能發揚仁濟善業，承傳歷屆前賢仁德濟困的精神。
講到仁濟前賢，Baldwin哥哥鄭承隆（Edwin）亦做過仁濟主席，Baldwin自然可以隨時同阿哥請益，不過尋日就唔見Edwin去撐場。
孫蔡吐媚「最高出席率」
交接典禮上仲頒發「最高籌款獎」及「最高出席率獎」，仁濟總理孫蔡吐媚（Mary）分別攞得季軍及冠軍。想攞最高出席率獎一啲都唔簡單，孫太笑笑口話，過去一年幾乎日日都有活動，好彩佢間公司已有囡囡接手打理，佢先至可以抽身出來做善事。Mary先後做過博愛醫院及仁愛堂總理，加入善團足足十年，佢笑稱，雖然做善事忙過返工，但係愈做愈開心。
中華出入口商會會長張學修及太太都有到場，為大女張文嘉（Marcella）就職總理打氣。加入仁濟已經第七年的Marcella現時幫手打理家族生意，做總理期間仲不忘修讀博士，係仁濟董事局嘅高材生。Marcella話，加入仁濟後得益良多，尤其係見到平時好少機會見到的基層生活，例如去老人院探訪，佢亦會帶幾歲大的小朋友幫手賣旗，自細培養佢哋服務社群的精神。張學修聽到囡囡咁識諗，梗係開心笑晒喇。
卓妮