政情：學民組黨出師不利 開戶口被拒
學民思潮上月宣布解散，成員會一分為二過檔去新政黨同新學生組織，新政黨更會最遲喺四月中成立添！不過新政黨組成睇嚟一波三折，繼逾百萬元資產點處理惹起爭議後，前召集人黃之鋒尋日更自爆組黨再遇阻滯。
個人戶口收捐款 瓜田李下
黃之鋒話兩星期前同前成員周庭向滙豐銀行申請開設聯名戶口，但銀行就以行政及商業安排等理由拒絕，而佢加開個人戶口嘅申請亦同樣被拒。雖然開設戶口唔成功，但佢就話唔會影響新政黨運作，更唔排除搵律師同會計師監察，用個人戶口收政黨捐款添！不過，個人戶口就難免會惹來瓜田李下嘅懷疑喇！
除咗黃之鋒，本土民主前線同樣試過開戶口被拒，但近日就成功用網台名義開設公司戶口！雖然青年新政未開到戶口，但就透露曾經獲批，只係佢哋有保留而唔開！
滙豐銀行隨後回應話唔會因為客戶嘅政治立場拒開戶口，又指基於保密政策唔評論個別客戶事宜，仲話根據程序，附帶合適資料或文件嘅申請會獲得處理。