政情：有相為證：阿基做拓荒者 轉戰新西

民協多年來銳意突破「深水埗黨」呢個稱號，一二年立法會選舉搵咗馮檢基（阿基）挑戰超級區議會議席，原有九龍西議席就由地區老將譚國僑接班，點知譚國僑接唔到棒，最終未能打破「一人黨」宿命。由於阿基去年底連任區議員失敗，無資格再參選超級議席，但又唔好意思食回頭草返九龍西參選，於是有傳佢會轉戰九龍東或新界西選區。隨着立法會選戰逼近，阿基上月已落戶荃灣開設議員辦事處，又喺附近掛橫額以及直幡，尋日又到元朗及屯門擺街站呼籲市民登記做選民，睇嚟佢已確定轉戰新界西選區。不過，年逾六十歲嘅阿基都仲要跨區開荒參選，擒高擒低嗌咪要靠腰力靠腳力，從政路認真難行。