中環出更：EQ落區「捕獲」兩巨龜
立法會議員葛珮帆（EQ）在去年區議會選舉連任失敗後，最近積極落區，相信是備戰九月立法會選舉。尋日EQ到沙田廣林苑工作時，「野生捕獲」兩隻巨型盾臂龜，仲一齊散步添，陪龜散步都係第一次見。EQ在facebook放咗一段同兩隻巨龜散步嘅片段，片中所見，兩隻龜身形龐大，行動相當敏捷，遠睇以為係「龜帆賽跑」。
由手掌咁大養到廿公斤重
EQ引述兩隻巨龜嘅主人所講，呢種龜叫盾臂龜，淺色嗰隻就叫旦哥，深色嗰隻就叫達仔，初初帶返屋企時只有手掌咁大，依家已經六歲幾，每隻體重有成廿公斤，即有兩包十公斤米咁重。EQ仲話，呢種龜好乖唔會咬人，又唔難養，平日主要只係食草。
盾臂龜嘅原產地係非洲，個性活潑好動，生長速度好快，短短三年身形已經有成三十厘米，最大體積仲要比依家嘅旦哥同達仔大多兩倍。由於盾臂龜嘅身形龐大，需要一個比較大嘅地方去飼養，市區嘅高樓大廈就唔太適合喇，所以新界區嘅村屋啱晒。
卓妮