政情：壞發問燈掣 范國威「失聲」
立法會財務委員會尋日舉行特別會議，審核政府未來一年嘅開支預算，議員就公務員事務、司法等方面向政府提出跟進問題。會議開到一半，我哋發現新民主同盟議員范國威枱面有盞紅燈閃吓閃吓，莫非佢有事發出緊急求救信號？原來只係佢枱面上要求發言嘅燈掣壞咗啫。
范國威之後話，要求發言嘅燈掣壞咗「激死佢」，事關佢都有唔少跟進問題想問官員，但係個燈掣壞咗就令佢難以發問，佢已經即時通知立法會職員處理，但完會之前仍然未整番好。佢話，暫時都要透過寫紙仔呢個原始方法通知秘書想發問，如果想再問多幾輪就要傳幾次紙仔，都幾麻煩。下星期財委會一連四日舉行特別會議，相信到時佢個燈掣應該整番好喇。